والله العظيم اني صادقه في كل كلمه أقولها,,شعري صار ناااااااااعم ..تعالوا شوفوا السبب

السلام عليكم يابنات حـــــواء ياحلوات...

أنا شعري مثل مايعاني من انه مايطول بسرعه,موناعم مره
يعني جاف ولافيه لمعه ولافيه حيويه أبد أبد
ومع الجفاف فيه شعيرات متقرعطه >>>>القصيميه تبي تفهمه

قلت بما اني لقيت حل يطول شعري,,
لاااااااااااااازم القى حل علشان يخليه ناعم شوي
لأنه شعري هالفتره مره مره منعدم من عقب الصبغات وحت إذا استشورته شوي وينفش..
لكن هالحين جنن نااااااااااااعم وإذا استشورته اي كلام يطلع يهبل..
جربت خلطه مع انه مادخلت مزاجي,,
لكن عقب ماجربته,

والله اني ماصدقت وشلون صار شعري,
ناعم ويطيح على اعيوني,وأحس ثقتي بنفسي عاااااليه
ووالله العظيم انه حتى زوجي لاحظ
وقالي:
يافلانه انتي رايحتن تحت البعير ومبوله عليك>>>>>>>>شفتوا كلامه من زود الرومانسيه
قلت ليه؟
قال يتهفهف>>>>>أيضآ لغه قصيميه


لأنه فعلآ شي عجيب هالخلطه.
أدري ودكم تطحنون لأني طولت عليكم بس أبشروا أبقولكم::

الخلطه هي كالأتي:::

علبة زبادي المراعي.
ملعقتين عسل
ملعقتين زيت زيتون
ملعقه خل تفاح أو خل أبيض
ملعقتين خلطة زيوت أنتي مخلطتها

أنا حطيت الخلطه اللي قبل ونزلته هنا اللي تطول الشعر ..
أخلطيهم مع بعض وحطيها على شعرك وخليه ساعه
وإذا أكثر أحسن يعني ساعتين,,ولفي شعرك بكيس,,وعقبها تروشي عادي بالشامبو وحطي بلسم
وخلي بالحمام دايم فوطه علشان عقب ماتحطين
البلسم او الفاشكول حطي الفوطه بمويه حاره وحطيها على شعرك على بال ماتغسلين جسمك
غسلي شعرك..


ووالله العظيم اني حبيت افيدكم وأفيد كل وحده ودها يكون شعرها ناعم,لأن الشعرهو جمال المرأة,ويوم جربت النعومه
حسيت بثقه وبس اشوف نفسي بالمرايه وألمسه كل شوي,,
جربوها وأدعوا لي..
واللي جربت تقولي وش نتيجته..